Geita. Serikali imeanza kupitia mpango uliohuishwa wa kufunga Mgodi wa Dhahabu wa AngloGold Ashanti Geita Gold Mine (GGM), katika hatua inayolenga kuhakikisha shughuli za uchimbaji zinapoisha, mazingira na uchumi wa jamii zinazozunguka mgodi vinaendelea kulindwa.
Kamati ya Kitaifa ya Ufungaji Migodi imefanya kikao katika mgodi huo uliopo Wilaya ya Geita, Mkoa wa Geita, kwa ajili ya kuupitia na kuujadili mpango huo ili kubaini kama unakidhi matakwa ya sheria na kanuni za Tanzania.
Hatua hiyo ina maana kwamba ufungaji wa mgodi hauangaliwi kama suala la kusimamisha uzalishaji pekee, bali pia kama mchakato unaohitaji maandalizi ya kurejesha mazingira na kupunguza athari za kiuchumi na kijamii zinazoweza kujitokeza baada ya mgodi kufungwa.
Kikao hicho kimewakutanisha wataalamu kutoka Ofisi ya Makamu wa Rais, Wizara ya Maji, Wizara ya Maliasili na Utalii, Wizara ya Madini, Tume ya Matumizi Endelevu ya Ardhi, Baraza la Taifa la Hifadhi na Usimamizi wa Mazingira (NEMC), Chuo Kikuu cha Dar es Salaam (UDSM), Tume ya Madini pamoja na viongozi wa Wilaya.
Akiongoza kikao hicho, Mwenyekiti wa Kamati ya Kitaifa ya Ufungaji Migodi, Mhandisi Hamisi Kamando, alisema migodi mikubwa na ya kati inatakiwa kisheria kuandaa na kuwasilisha mipango ya ufungaji migodi kwa ajili ya mapitio, majadiliano na uthibitisho.
Alisema matakwa hayo yanalenga kuhakikisha kuwa mipango ya kampuni za uchimbaji haishughulikii uzalishaji pekee, bali pia inaweka wazi hatua zitakazochukuliwa wakati na baada ya mgodi kufungwa.
Kwa mujibu wa Mhandisi Kamando, Sheria ya Madini, Sura ya 123, pamoja na Kanuni ya 206 ya Kanuni za Usalama, Afya na Utunzaji wa Mazingira za mwaka 2010, zinawataka wamiliki wa migodi kuandaa mipango ya ufungaji na kuiwasilisha kwa Mkaguzi Mkuu wa Migodi kwa mapitio ya kitaalamu kabla ya kuidhinishwa na Kamati ya Kitaifa ya Ufungaji Migodi.
“Kazi ya Kamati ni kupitia, kujadili na kuthibitisha mipango ya ufungaji migodi ili kuhakikisha ufungaji unarejesha mazingira katika hali iliyokuwa kabla ya kuwepo kwa mgodi, lakini pia kuhakikisha jamii inayozunguka migodi inaendelea kiuchumi hata baada ya mgodi kufungwa,” alisema.
Kauli hiyo inaweka uzito katika suala la maisha baada ya mgodi, hasa kwa jamii ambazo zimejenga shughuli zao za kiuchumi na kijamii kwa kutegemea uwepo wa shughuli za uchimbaji.
Kwa upande wake, Meneja wa Mazingira wa GGM, Yusuph Mhando, alisema mgodi umeandaa mpango huo kwa kuzingatia masuala ya usalama, afya, mazingira na jamii inayozunguka eneo la mgodi.
Alisema uongozi wa mgodi utazingatia maelekezo yatakayotolewa na Kamati baada ya mapitio ya mpango huo na kuahidi kuendelea kutoa ushirikiano katika mchakato mzima.
Uchambuzi wa mpango huo unatarajiwa kusaidia kubaini maeneo yanayohitaji maboresho kabla ya mpango huo kuthibitishwa, huku serikali ikisisitiza umuhimu wa kuhakikisha shughuli za uchimbaji haziachi mzigo wa kimazingira na kiuchumi kwa jamii baada ya uzalishaji kukoma.
Post a Comment